Periko gazteekin hizketan

Behin baino gehiagotan eskatu zitzaion Periko Solabarriari bere bizitza kontatzeko eta, pertsonalismotik ihesi, ez zuen nahi izan. Baina, gazteek harengana jo eta haren bizitza eta bizipenengandik zerbait ikas zezaketela azaldu ziotenean, betiereko borrokalariak eskakizuna onartu egin zuen. Hala, bada, Perikoren Lutxanako etxeko txirrina jo, eta kontatzeko asko zuen lagun bati mihitik tiraka lasaitasunez solasean jardunez, liburu hau bilbatzeari ekin zioten.
Emaitza ez da pertsonaia historiko baten biografia, izan ere, orriotan Perikoren bizipenez gain, Ezker Abertzalearen bizitza bera dago, sorreratik bertatik gaur egun arte.
Dokumentu hau bizimodu eredugarria izan duen militante baten ondarea da euskal gazteria borrokalariarentzat eta lehen mailako testamentu politiko eta soziala Euskal Langile Herri osoarentzat.